Кушкӑри вӑтам шкулта тӗрлӗ халӑх ачисем вӗренеҫҫӗ: чӑваш, тутар, вырӑс. Çавӑнпа та вӗрентекенсем ачасем телейлӗ те туслӑ ӱсчӗр тесе тӑрӑшаҫҫӗ.
Ака уйӑхӗн 28-мӗшӗнче ир-ирех чӑваш, тутар, вырӑс халӑхӗсен капӑр тумне тӑхӑннӑ ачасем шкулалла утаҫҫӗ. Хӑйсемпе пӗрле пурте амӑшӗпе хатӗрленӗ тутлӑ апат-ҫимӗҫ йӑтнӑ. Мӗншӗн тесен паян шкулта «Чӑвашпа тутар хурӑнташ» ятлӑ апат-ҫимӗҫ конкурсӗ иртет.
Чӑваш ҫӗр-шывне ахальтен мар ҫӗр пин юрӑ, ҫӗр пин сӑмах, ҫӗр пин тӗрӗ ҫӗр-шывӗ теҫҫӗ. Чӑваш тӗрриллӗ тумтир ытти халӑхсеннинчен чылай уйрӑлса тӑрать. Авалхи чӑваш тӗрри икӗ енчен пӑхсан та – хуть тӱнтер, хуть пиччӗн – пӗрешкел. Çакӑ чӑваш хӗрарӑмӗ тирпейлӗ, ҫав вӑхӑтрах чӑтӑмлӑ пулнине пӗлтерет.
Тутарпа вырӑс халӑхӗсен тумӗсенче те хӑйӗн вӑрттӑнлӑхӗсем, илемлӗхӗсем пур. Тӗрлӗ халӑхӑн йӑли-йӗркине упрар, килӗштерсе пурӑнар.